Fimmtudaginn 4. ágúst heimsóttu félagar úr Félagi skógarbænda á Vesturlandi Jón Guðmundsson garðyrkjufræðing og ávaxtaræktanda á Akranesi þar sem ávaxtatrjárækt hans var skoðuð. Meðfylgjandi eru myndir úr heimsókninni..

Kæru félagar í FsV !

Fimmtudaginn 4. ágúst ætlar Jón Guðmundsson ávaxtabóndi á Akranesi, Vesturgötu 73, að sýna okkur ávaxtaræktina sína.  Við hittumst hjá honum kl.  15:00  og verðum í u.þ.b. 1 klst.

Eftir heimsóknina förum við og fáum okkur kaffi og með því hjá Garðakaffi sem er á safnasvæðinu á Akranesi.  Kaffi og með því kostar  1.500 kr. á mann.

Þessi ferð er á kostnað hvers og eins en þess í stað ætlar félagið okkar, FsV, að styrkja hópferð á aðalfund LSE, Landssamtaka skógaeigenda, austur á Hérað í haust, 6. – 8. október. 

Við viljum hvetja ykkur  að heimsækja félaga okkar á Austurlandi og taka  þátt í aðalfundinum sem er bæði fróðleg og skemmtileg samkoma með skógarbændum á landsvísu.  Nánara fyrirkomulag þeirrar ferðar verður auglýst síðar.

Tilkynnið þátttöku sem fyrst  í ávaxtaheimsóknina til Jóns og hvort þið hyggist fara í kaffið með hópnum með því að svara þessum pósti.  Upplagt er líka að sameinast í bíla með því að bjóða eða óska eftir fari hér á póstlistanum.

Bestu kveðjur

Stjórn Félags skógarbænda á Vesturlandi.

Bergþóra        866-4175  hrutsstadir@simnet.is

Guðmundur   862-6361  gudmundur@vestskogar.is

Hraundís         864-1381 raudsgil@gmail.com

Til Skógarbænda hjá Vesturlandsskógaum

Þeir skógarbændur sem óska eftir uppgjöri fyrir gróðursettar plöntur, fyrri hluta árs,  þurfa að skila framkvæmdarskráningu í síðasta lagi föstudaginn 15. Júlí.  Að öðrum kosti fer uppgjör fram með haustuppgjöri.

Eyðublöð vegna framkvæmdarskráningar má nálgast á heimasíðu Vesturlandsskóga www.vestskogar.is undir eyðublöð og samningar

 skógardagurinn 2011

Það styttist óðum í 23. júní, afmælisdag Félags skógarbænda á Vesturlandi. Í þetta sinn ætlum við að hittast hjá Jóni og Jóhönnu á Innra-Leiti á Skógarströnd. Þau ætla að segja okkur frá skógræktinni sinni og verður lagt af stað í göngu kl. 18:00.  Félögum er velkomið að mæta fyrr ef þeir óska.

Að göngu lokinni ætlum við að borða saman úti.  Komið sjálf með drykki að eigin vali og KLÆÐIÐ YKKUR VEL.Ef einhverjir vilja gista eru nokkur gistipáss í gestahúsi einnig geta menn komið með tjaldvagna o.þ.h. búnað og gist á Leitinu.

Gaman væri að sem flestir gætu komið og gott væri að þið létuð Bergþóru vita í símum 434-1175 og 866-4175 eða á hrutsstadir@simnet.is

Innra- Leiti er á Skógarströndá norðanverðu Snæfellsnesi við þjóðveg nr. 54 u.þ.b. 30 km frá  Búðardal. Hægt er að fara Bröttubrekku úr Borgarfirði en úr Reykjavík er styst að fara Heydalsveg (það sendur Búðardalur á skiltinu við vegamótin) og Innra-Leiti er fyrsti bær til hægri þegar komið er yfir Heydal.

Mætum sem flest vel búin og hress

Stjórn FsV

Í tilefni að alþjóðlegu ári skóga voru félagar í Félagi trérennismiða með sýnikennslu og námskeið í trérennismíði að Fitjum í Skorradal sunnudaginn 5.júní. Renndur var viður beint úr skógi. Helstu trérennismiðir landsins mættu og sýndu listir sínar einnig fengu gestir að reyna sig við rennibekkinn og fengu góð ráð hjá félagsmönnum. Að loknu námskeið var boðið uppá kaffi og með því í boði  systkinanna Huldu og Jóns á Fitjum. Í tengsum við námskeiðið var sölusýning  Félags trérennismiða opnuð á munum renndum úr tré.  Sýningin mun standa í allt sumar og er opin frá 14.00 – 18.00 alla daga nema mánudaga og þriðjudaga..  Margt glæsilegra muna er á sýningunni og er þess virði að skreppa að Fitjum og skoða sýninguna. Meðfylgjandi eru nokkrar myndir  sem Kolbrún Baldursdóttir tók.

Aðalfundur Félags skógarbænda á Vesturlandi var haldin að Hótel Hamri 26. apríl. Vel var mætt á fundinn og sköpuðust líflegar umræður um málefni skógarbænda og skógræktar.
Fyrir utan hefðbundin aðalfundarstörf fluttu eftirtalin erindi:  Hulda Guðmundsdóttir í  tilefni af alþjóðaári skóga, Björn B Jónsson  fyrir hönd Landssambands skógareigenda og Sigvaldi Ásgeirsson ræddi  stöðu og horfur hjá Vesturlandsskógum. Ein breyting varð á stjórn félagsins, Þórarinn Svavarsson, Tungufelli,  sem verið hefur gjaldkeri undanfarin sex ár gaf ekki kost á sér og var Guðmundur Sigurðsson, Hvanneyri, kjörin í hans stað. Bergþóra Jónsdóttir, Hrútsstöðum, er áfram formaður og Hraundís Guðmundsdóttir, Rauðsgili,  ritari. Varamenn eru Jón Zimsen, Innra-Leiti, Halldór Jóhannsson, Gautastöðum og Lúðvíg Lárusson, Breiðabólsstað Skógarströnd. 

Aðalfundur FsV verður á Hótel Hamri þriðjudaginn 26. apríl
fudurinn hefst kl: 18:00. Venjuleg aðalfundarstörf.

Tímamótaráðstefna tengd Alþjóðlegu ári skóga á Íslandi 2011

Ráðstefnan verður haldin á Radisson Blu Hótel Sögu fimmtudaginn 28. apríl frá kl. 08:00 – 17:00. Ráðstefnan ber yfirskriftina Íslenska skógarauðlindin – skógur tækifæra og er markmiðið að gera keðjuna frá framleiðenda til markaðar skilvirkari og skýrari.

Ráðstefnuverð er kr. 6900.- sem staðfestist og greiðist við bókun. Skráning fer fram hér. Innifalið í ráðstefnupakka eru fjölbreyttir fyrirlestrar og umræða, morgun- og síðdegiskaffi, hádegisverðarhlaðborð og ráðstefnugögn. Continue reading →

Þér er hér með boðið að taka þátt í Fagráðstefnu skógræktar 2011, sem haldin verður í Reykjanesi við Djúp, dagana 23.-25. mars, n.k.

Ráðstefnan er árleg. Hefð er fyrir því að hún flakki réttsælis um landið og sé alltaf haldin á nýjum og nýjum stöðum. Að þessu sinni verður hún í Reykjanesi við Ísafjarðardjúp. Skipuleggjendur eru:

• Skjólskógar á Vestfjörðum: Sæmundur Kr. Þorvaldsson.
• Rannsóknastöð skógræktar á Mógilsá og Skógfræðingafélag Íslands: Aðalsteinn Sigurgeirsson.
• Skógræktarfélag Íslands: Einar Gunnarsson
• Landbúnaðarháskóli Íslands: Bjarni D. Sigurðsson. Continue reading →

Á árinu 2010 voru gróðursettar rúmlega 500 þúsund plöntur á vegum Vesturlandsskóga og er gert ráð fyrir 400 –500 þúsund plöntum til gróðursetningar í ár á svæði Vesturlandsskóga.

Vesturlandsskógar verða með stafafuru, sitkagreni, ilmbjörk, sitkabastarð og ösp sem aðalegundir í ár, einnig verður takmarkað magn af evrópulerki, rússalerki og sitkaelri ásamt reynivið sem ætlaður er í skjólbelti. Vonir standa til að fá eitthvað af runnum í skjólbelti. Öspin verður bæði sem stiklingar og bakkaplöntur í 35 gata bökkum.

Sitkabastarður og sitkagreni verða í 24 og 40 gata bökkum,  aðrar plöntur verða  í 40 gata bökkum.

Pantanir þurfa að berast til Vesturlandsskóga fyrir 1. mars 2011 bæði vegna nytjaskógræktar og skjólbeltaræktar. Taka skal fram hvort um vor eða haustgróðursetningu sé um að ræða.

Áætlað er að hafa mismunandi klóna af jörvavíði- og asparstiklingum til boða í skjólbeltin í ár ásamt eitthvað af reynivið. Þeir sem hyggja á ræktun skjólbelta gefi upp lengd beltis og fjölda raða eins hugsalegar tegundir í beltið.  Starfsmenn Vesturlandsskóga munu síðar í samráði við viðkomandi bónda gera endalega áætlun um tegundir í skjólbeltin.

Pantanir sendist til Vesturlandsskóga á netfangið vestskogar@vestskogar.is

símar 433 7052 og 433 7054.